Më shumë se 260 refugjatë Rohingya, kryesisht gra dhe fëmijë, mbërritën në Indonezi me dy varka, njoftuan zyrtarët.
Zyrtarët e policisë dhe ushtrisë po punojnë me Agjencinë e OKB-së për Refugjatët (UNHCR) dhe qeverinë lokale për të mbledhur më shumë informacion rreth refugjatëve, të cilët mbërritën të dielën mbrëma, dhe për t’i mbrojtur ata, tha shefi i policisë lokale.
Indonezia ka bërë thirrje për ndihmë nga komuniteti ndërkombëtar pas një rritje të numrit të Rohingya-ve që ikin nga kampet e mbipopulluara të refugjatëve në Bangladesh që nga viti i kaluar.
Rreth një milion myslimanë Rohingya jetojnë në kampe në Bangladesh pasi u larguan nga Mianmari. Midis tyre janë rreth 740,000 që ikën nga një fushatë brutale ushtarake në 2017 nga forcat e sigurisë së Mianmarit, të cilët më pas u akuzuan për përdhunim dhe vrasje masive.
Indonezia, si Tajlanda dhe Malajzia fqinje, nuk është nënshkruese e Konventës së OKB-së të vitit 1951 për Refugjatët dhe nuk është e detyruar t’i pranojë ato. Megjithatë, ai vend përgjithësisht ofron strehim të përkohshëm për refugjatët.
Autoritetet malajziane thanë të shtunën se kishin bllokuar dy varka që transportonin rreth 300 refugjatë Rohingya që u përpoqën të hynin ilegalisht në vend. Autoritetet thanë se dy varka të tjera po përpiqeshin të hynin pasi 196 Rohingya mbërritën në ishullin verilindor të Langkawi të premten, ku po mbahen./K.K
