Duke nisur nga 13 Marsi platforma e rrjetit social TikTok nuk do të funksionojë në Shqipëri. Në zbatim të vendimit të qeverisë për mbylljen për një vit të kësaj platforme, Autoriteti i Komunikimeve Elektronike dhe Postare i ka kërkuar kompanive të internetit konfirmimin me shkrim për bllokimin e aksesit në aplikacionin TikTok dhe infrastrukturën e tij dixhitale në territorin shqiptar.
Gjithashtu AKEP u ka dërguar një email edhe kompanive celulare në vendin tonë që të marrin masat e duhura.
Vendimi për të mbyllur për 1 vit TikTok erdhi pas një konsultimi të nisur nga qeveria me prindërit, i nxitur nga vrasja e 14-vjeçarit në shkollën “Fan Noli”.
Gjatë këtij viti, qeveria shqiptare do të vijojë komunikimet me drejtuesit e TikTok që të merren masa për vendosjen e filtrave që pengojnë promovimin e materialeve me përmbajtje ku ka dhunë ose promovohet gjuha e urrejtjes.
Këtë vendim të qeverisë, opozita e ka cilësuar se ndërmerret si cenim të fjalës së lirë dhe në prag të zgjedhjeve të 11 Majit, teksa ka paralajmëruar protestë më 15 Mars kundër këtij vendimi./E.T
