Sot Raporteri për Shqipërinë në Parlamentin Europian, Andreas Schieder, prezantoi Raportin për Shqipërinë në Komisionin e Marrëdhënieve me Jashtë në Parlamentin Europian (AFET). Raporti mbulon vitet 2023 dhe 2024, si dhe muajt e parë të këtij viti. Raporti bazohet përgjithësisht në raportet e Komisionit Europian për Shqipërinë, si dhe në zhvillimet që prej muajit tetor të vitit të kaluar.
Si në prezantimin e Raporterit, përfaqësues të grupeve parlamentare në Parlamentin Europian, linjëzohet vlerësimi i progresit, i vendosmërisë së Shqipërisë për të ecur shpejt dhe qëndrueshëm në procesin e integrimit europian.
Zgjedhja bindëse e Shqipërisë për rrugën europiane, angazhimi i palëkundur në rrugën e reformave të thella e kurajoze, hapja e bisedimeve për dy Grupkapituj dhe perspektiva e qartë për të hapur së shpejti edhe Grupe të tjera Kapitujsh, në një projekt ambicioz të Shqipërisë dhe BE-së, për të hapur negociatat në të gjithë Kapitujt brenda këtij viti, linjëzimi i plotë dhe i vazhduar me politikën e përbashkët të jashtme dhe të sigurisë së BE-së, pjesëmarrja në operacionet e BE-së, roli stabilizues në rajon, ishin ndër aspektet thelbësorë që u prezantuan nga folësit. Të gjithë folësit e inkurajuan qeverinë, të gjitha institucionet shqiptare dhe aktorët e tjerë në Shqipëri për të vazhduar në këtë linjë dhe me këtë rritëm.
Në diskutime u përmendën edhe sfidat që duhen adresuar. Shqipëria u inkurajua të vazhdojë më tej luftën ndaj korrupsionit për çka njihet përparimi i njëmendtë, i bërë në vitet e fundit; kërkohet adresimi i përshtatshëm i problematikave me të cilat përballet hapësira mediatike në vend, duhen bërë përpjekje nga të gjitha palët për të përmirësuar dialogun politik në vend, e për të shmangur polarizimin e “skajshëm”. Po ashtu, u theksua rëndësia e organizimit të zgjedhjeve të lira e të drejta, si gur themeli për forcimin e demokracisë dhe të ardhmes europiane të vendit.
Ky ishte diskutimi i parë në AFET mbi Raportin, i cili pritet të miratohet në qershor 2025.
Përfaqësues të Komisionit Europian dhe të Shërbimit të Jashtëm Europian (EEAS) bënë, po ashtu, prezantime të shkurtra, në të njëjtën linjë.
Ajo që është e dallueshme është një ndjenjë e përgjithshme, e përforcuar, besimi që është instaluar në Bruksel për Shqipërinë, për punën e përpjekjet e saj, në vullnetin e aftësitë, si dhe në vendosmërinë për ta bërë procesin e integrimit europian një sukses për Shqipërinë dhe njëkohësisht një kontribut në rrugën europiane të rajonit.
