I ftuar në emisionin e mëngjesit “Rreze Dielli” në Report TV, me moderatore Androniki Kolka, ishte nutricionisti nga Suedia Altin Joka, i cili foli për Oksitocinën, apo siç njihet ndryshe si “hormoni i dashurisë”.
Sipas Altinit, ky hormon është një qetësues natyral dhe i stresit, sikurse një element për mirëqenien emocionale, pa harruar që është determinante për lidhjet e forta sociale që ne mund të kemi ose jo. Ndaj oksitocina është quajtur si hormoni i dashurisë, miqësisë dhe i emocioneve.
“Oksitocina merr pjesë në rritjen e njeriut dhe në shërimin e trupit tonë, madje është determinante në riprodhimin tonë për të ardhmen” shtoi Altini, duke vënë theksin tek efektet anti inflamatore, pa harruar se oksitocina e mbron trupin tonë nga traumat.
Gjithashtu oksitocina është ndihmues shumë i mirë në ushqyerjen me gji tek nënat e reja.
”Nëse një nënë ka mungesë të qumështit të saj, një arsye është mungesa e oksitocinës” tha Altini. Oksitocina ka efekt dhe kundër plakjes, pasi nëse një njeri plaket dhe thinjet më shpejt, atëherë ka mungesë të oksitocinës. Rritja e obezitetit gjithashtu lidhet dhe me uljen e oksitocinës në trup. Oksitocina balancon dhe nivelet e kortizolit, duke ulur stresin e organizmit.
Sipas Altinit, njeriu kur është i dashuruar dhe nuk ndërron partner shpesh, prodhon oksitocinë në mënyrë të përhershme. Kur kemi nivel më të lartë të oksitocinës, tek meshkujt mund të kemi zgjerim prostate, ndërsa tek femrat kancer gjiri.
“Bota virtuale dhe teknologjia janë ndikuese në uljen e nivelit të oksitocinës” tha Altini në vijim të bisedës. Njerëzit që përqafojnë shumë, që dhurojnë emocione, që bëjnë dhurata, rrisin nivelin e oksitocinës. Ngrënia e ushqimeve afrodiziake si mjalti, kafeja, çokollata, prodhimet e detit apo marrja e vitaminës D nga dielli çdo ditë, ndikojnë në rritjen e oksitocinës.
Studimet kanë parë që oksitocina është e ulur tek të dy gjinitë, si femra ashtu dhe meshkuj. Aktiviteti fizik ndikon shumë në nivelin e oksitocinës, dalja në natyrë dhe raportet sociale të afërta./ S,M
