Në restorantin Frida të resortit luksoz Grand Velas Los Cabos në Meksikë, shërbehet një nga tacos më të shtrenjta në botë – e vlerësuar me 25 mijë dollarë amerikanë. Ky takos përfaqëson kulmin e ekstravagancës gastronomike, duke u ofruar të ftuarve një përvojë të papërsëritshme kulinare.
Tacos është përgatitur me një tortilla misri të mbuluar me fletë ari dhe përbëhet nga përbërës ultra-premium si karkaleca langustine, mish Kobe, kavijar Almas Beluga dhe djathë Brie me trumzë të zezë. Mbi të shtohet një salcë speciale e bërë me speca morita të tharë, tequila të vjetër shumë të rrallë dhe kafe civet – një ndër më të shtrenjtat në botë, e prodhuar nga kokrrat e kafesë që janë përpunuar në stomakun e një kafshe të quajtur civet.
Për të plotësuar përvojën, ofrohet edhe një shishe tequila me çmim marramendës prej 150,000 dollarësh, e bërë nga ari i bardhë dhe platini i pastër.
Shefi ekzekutiv i atëhershëm i resortit, Juan Licerio Alcala nga Durango, ishte krijuesi i këtij koncepti ekstravagant. Në një ankand bamirësie, kjo taco u shit për 27,960 dollarë, ku fitimet shkuan për Fondacionin për Fëmijët e Los Cabos – një organizatë që ndihmon fëmijët në Baja California Sur./E.Ç
