Kryebashkiaku demokrat i Kavajës, Fisnik Qosja është shprehur këtë të hënë se do të vazhdojë të bashkëpunojë me qeverinë socialiste për të mirën e qytetarëve të tij, në kushtet kur Partia Demokratike nuk arriti dot të bënte rotacion.
“Ne do fitojmë dhe do vazhdojmë bashkëpunimin me qeverinë se nuk kemi çfarë bëjmë, për të mirën e qytetarëve”, u shpreh Qosja për RTSH.
Kavaja është e vetmja nga bashkitë e qarkut Tiranë ku gara kryesohet nga Partia Demokratike. Sipas Fisnik Qoses, bashkia që ai drejton ka qenë përherë prijëse e ndryshimeve, por këtë herë nuk është ndjekur dot nga bashkitë e tjera.
“Për hir të së vërtetës jam shumë i kënaqur me të gjithë mbështetësit, me gjithë njerëzit. Jam mirënjohës dhe na shton përgjegjësinë e punëve të mira që kemi për të bërë përpara.
Kavaja gjithmonë ka qenë prirëse e ndryshimeve, pavarësisht se nuk na kanë ndjekur të tjerët këtë radhë. Por ne nuk dorëzohemi, kështu që do ecim përpara”, ka deklaruar kryebashkiaku i PD nga qendra vendore e numërimit të votave. m.p.
