Konsulli i Nderit të Shqipërisë në Danimarkë, Përparim Kalo ka shkruar disa fjalë prekëse për mikun e tij, artistin Arben Bajo i cili ndërroi jetë për shkak të virusit COVID-19.
Në një postim në rrjetet sociale, ai kujton momentet që ka kaluar me Bajon dhe shprehet se figura e tij është përjetësua tashmë në skulpturë që do të mbetet skulpturë mbi skulpturat.
Postimi i plotë:
Përsëri dy fjalë për Ben Bajon…
Ben, dhimbja e tërë miqve që u përcoll tërë këto ditë nga miqtë dhe media është dëshmi e vlerave që ke lënë pas. Jo vetëm art, jo vetëm mendim, por mbi të gjitha ti Ben ke lënë pas mirësi. Mirësi që fliste përmes shikimit të pastër, mjekrrës së butë, buzeqeshjes së lehtë dhe fjalës së ngrohtë. Marrëdhënia jonë ishte e re, vetëm 15 vjeçare po unë kam ndjesinë sikur njiheshim shumë më herët, qëkur skishim ardhur ende në këtë botë. Këtë ndjesi krijoi thjeshtësia, komunikimi yt me kod etik e artistik. Vizitat në studion tënde ishin përherë mbresëlënëse. Përherë gjeje diçka të re, përherë kishe në kokë një projekt të ri. Mbaj mend që Prof Gazmend Leka më fliste përvty me admirim. Të çmonte pamasë e të ngrinte në qiell. Për forcën e vendosmërinë tënde në rrugën drejt konsolidimit të emrit dhe statusit tënd si skulptor i klasit të parë. Skulptor që realizonte 6-7 ekspozita në vit – një rekord. Unë u mësova dhe miqësova me frymën që përshkonte punët e tua dhe ndihesha i uritur. Pata fatin të rrëmbej një numër skulpturash që tashmë heshtin në mjediset private të shtëpisë e të zyrës, në respekt të mjeshtrit që iku, ndërkohë që i solli ato në jetë. Si një Xhepeto i kohëve moderne ti u dhe skulpturave sy, veshë e gojë për të parë, dëgjuar e folur për çuditë e mijëvjeçarit të ri, madje edhe të paradokseve që u shfaqën në trajtimin e diferencuar të disa viktimave të COVID 19. Ti nuk munde ta mundje atë, por figura jote u përjetësua tashmë në skulpturë që do të mbetet skulpturë mbi skulpturat! Jetoje paqen e përtejme mik i mirë!
/En.Br./Fjala.al
