Pas uljes në tryezë të përfaqësuesve të opozitës dhe mazhorancës për reformën zgjedhore duket se kriza politike në vend ka hyrë në rrugën e zgjidhjes.
Megjithatë, kryetari i Partisë Demokratike, Lulzim Basha është shumë kontradiktor në veprimet e tij politike, kur nga njëra anë ulet në tryezë me të akuzuarin kryesor për vjedhjen e zgjedhjeve, Damian Gjiknurin dhe ana tjetër thërret protesta për largimin e qeverisë.
Kreu i PD-së kërkon të mbajë sistemin aktual zgjedhor duke u ulur në tryezë, qoftë edhe me Damian Gjiknurin. Nga ana tjetër, kërkon të qetësojë dhe të mbajë të karikuar militantët e tij se ai në të vërtetë synon rrëzimin nga pushtetit të kryeministrit Edi Rama.
Pavarësisht se situata politike në Shqipëri është krejtësisht paradoksale, ndërkombëtarët e kanë përshëndetur uljen në tryezën e reformës zgjedhore të përfaqësuesve të opozitës dhe mazhorancës. Nga ana e tyre, gjermanët e kanë mbështetur këtë iniciativë ndërsa kanë kërkuar plotësimin e kushteve të tjera të Bundestagut.
Komisioneri i BE-së vjen në Tiranë
Dy ditë pas uljes së palëve në tryezën e reformës zgjedhore në Shqipëri do të mbërrijë sot Komisioneri për Zgjerim i Bashkimit Evropian, Oliver Varhelyi.
Ai do të qëndrojë sot dhe nesër në Tiranë. Kjo është vizita e parë në rajon prej marrjes së detyrës në fund të vitit të kaluar.
“Varhelyi do ta shfrytëzojë vizitën për të theksuar edhe një herë përkushtimin e plotë të Komisionit Evropian ndaj së ardhmes evropiane të Shqipërisë dhe Maqedonisë së Veriut”, thuhet në njoftimin e Komisionit Evropian.
Varhelyi pritet të takohet me presidentin, Ilir Meta, dhe përfaqësues të tjerë të shtetit. Gjithashtu, ai ka parashikuar një vizitë në Durrës, i cili u godit nga tërmeti shkatërrimtar i 26 nëntorit të vitit të kaluar.
