Një grua, nënë e tre fëmijëve është arrestuar pasditen e së premtes në Tiranë, pasi ishte shpallur në kërkim ndërkombëtar nga Italia për terrorizëm.
Burime për “Fjala” bënë me dije se në pranga ka rënë Lubjana Gjeçaj pranë zonës së Unazës së Madhe, në një operacion ku morën pjesë edhe homologët italian.
Nëna e tre fëmijëve dyshohet se ka qenë pjesë e një grupi radikal në shtetin fqinj ku pritet të ekstradohet pas disa ditësh e ku do të përgjigjet përpara drejtësisë për akuzat e ngritura.
Një krushqi e lidhur në vitin 2014 mes familjes së një vajze të re italiane dhe një shqiptari me origjinë nga Laçi u shndërrua në një celulë terroriste që rekrutonte luftëtarë për ISIS-in (shtetin islamik).
Pas 8 muajve hetime në 2014, në një operacion të gjerë të shtrirë në disa qytete në Itali dhe në Lushnjë të Shqipërisë, 10 persona ranë në pranga (4 italianë, 5 shqiptarë dhe 1 kanadez).
Pjesë e këtij grupi ishte Baki Çoku, Dritan Gjeçaj, Aldo Kobuzi, Arta Kakabuni, dhe Lubjana Gjeçaj, e arrestuar pasditen e së premtes në Tiranë.
Ky grup i strukturuar kriminal, kryente martesa mes të rinjve dhe i dërgonte ata në Turqi, dhe më pas në Siri për të luftuar për të ashtuquajturin Shteti Islamik.
Pas marrjes së informacionit për vendndodhjen e 43-vjeçares në Shqipëri në zonën e Unazës së Madhe, efektivë shqiptarë dhe italianë rrethuan banesën ku strehohej shqiptarja, duke e prangosur. Për disa ditë ajo do të ekstradohet për në Itali, ku edhe do të japë “llogari” para drejtësisë./Bl.Ba/Fjala.al
