Shtyhet afati për nisjen e procesit të rivlerësimit të banesave. Ligji, i cilësuar si “amnisti” nga qeveria nuk ka hyrë ende në fuqi për shkak se nuk janë përgatitur aktet nënligjore. Zbatimi i tij është penguar nga një udhëzim që ende nuk ka dalë. Ligji pritet të hyjë në fuqi në 1 shkurt. Ministria e Financave dhe Agjencia e Kadastrës bëjnë me dije se ende po përgatitet udhëzimi për aplikimin e procesit të rivlerësimit, i cili parashikon uljen në 3 % të tatimit mbi të ardhurat nga 15 % që është në ligj.
Bëhet fjalë për udhëzimin që lidhet me verifikimin e vlerës së pasurive të paluajtshme, e cila do të merret për reference. Në udhëzim gjithashtu do të sqarohet mënyra sesi do të rivlerësohet një shtëpi e privatizuar me ligjin e vitit 1992, dhe do të ketë shembuj konkretë sesi do të veprohet me një shtëpi që është dhuruar apo ato që janë në proces legalizimi.
Skema e tatimit
Sipas ligjit të miratuar në fillim të vitit një qytetar që është në proces të shitjes së banesës apo biznesit, nuk mund të paguajë direkt tatimin 3 për qind, si diferencë midis çmimi të blerjes dhe atij të shitjes gjatë transaksionit, por duhet të bëjë më parë rivlerësimin. Dhe nëse rivlerësimi del më i ulët, se vlera që kërkon ta shesë, atëherë mbi këtë diferencë pronari i pasurisë duhet të paguajë 15 për qind.
Për shembull, nëse prona është blerë me çmimin 5 milionë lekë, dhe rivlerësohet në 7 milionë lekë, ndërkohë që pronari e shet 8 milionë lekë, atëherë detyrimi për tu paguar është 15 për qind e 1 milionë lekëve, apo 150 mijë lekë.
