Sot emisioni investigativ “Stop” publikoi denocnimin me zë dhe figurë të vajzës së një prej pacienteve që ndërroi jetë te spitali “Shefqet Ndroqi”.
Vajza e pacientes tha se për 1 muaj sanitarja që u hoq si infermiere i mori mbi 8 milionë lekë dhe ia shpërndante mjekëve dhe infermierëve të tjerë.
Ndërkohë ka reaguar menjëherë dhe Ministria e Shëndetësisë e cila urdhëron që të shkarkohet menjëherë sanitarja Tire Dervishi dhe autoritetet të marrin masat e duhura.
Reagimi i plotë
Ministria e Shëndetësisë dhe Mbrojtjes Sociale dënon me forcë veprimin e paligjshëm dhe korruptiv, të sanitares me inicialet T.A., tē spitalit “Shefqet Ndroqi”, i bërë publik sot në emisionin investigativ “STOP”.
Ministria e Shëndetësisë i ka kërkuar drejtorisë së spitalit “Shefqet Ndroqi” shkarkimin e menjëhershëm nga detyra të sanitares me inicialet T.A. Ministria e Shëndetësisë dhe Mbrojtjes Sociale u kërkon autoriteteve kompetente, të kryejnë sa më parë hetimin e këtij rasti, për t’i shkuar deri në fund.
Akti i izoluar i një punonjëseje të papërgjegjshme, nuk mundet kurrësesi të njollosë punën e jashtëzakonshme dhe sakrificën e mijëra mjekëve dhe infermierëve në të gjithë Shqipërinë, në këtë kohë të vështirë të pandemisë.
MSHMS falënderon emisionin investigativ “STOP” për denoncimin e rastit në fjalë dhe siguron qytetarët se nuk do të tolerojë asnjë rast abuzimi me të drejtën e tyre për të marrë shërbimin shëndetësor që u takon.
