Tërmeti që shkundi Tiranën dhe Durrësin mbrëmjen e së martës ka krijuar panik tek qytetarët të cilët jo vetëm kanë dalë në rrugë por tashmë kanë frikë të rikthehen në banesat e tyre. Kështu një e moshuar e kapluar nga paniku thotë se ka frikë që t’i çojë në banesë nipin dhe mbesën e saj.
“Kemi frikë që të flemë në shtëpi se nga tërmeti i parë na plasi gjysma e murit. Jemi më të sigurt jashtë, se brenda në këto momente. Jemi jashtë, na kanë premtuar por akoma. Fëmijët janë të vegjël, mbesa dhe nipi që flenë me mua, nuk kam ku t’i çoj. Shtëpia është gati për të rënë se e dëmtoi tërmeti i parë. Ndoshta shteti nuk do të na lerë” , shprehet ajo për Report Tv.
Ndërkaq, një çift që kishte dalë në rrugë nga frika e tërmetit u shpreh se do të vijojnë që të rrinë jashtë. “Lëkundjet i ndjemë por nuk zgjatën shumë. Po rrimë njëherë, por është edhe ftohtë. Frikë kemi nga tërmeti, nuk diskutohet, por edhe fiks pas dy muajve të atij të parit, ra tjetri”.
VIDEO-Tërmeti shkund Tiranën dhe Durrësin/ Njerëzit dalin në rrugë
Lëkundjet e forta të tërmetit me mangitudë 5.4 të shkallës rihter kanë shkaktuar panik te banorët e qytetit të Durrësit dhe atyre të Tiranës, dy qytete ku është ndjerë më shumë lëkundja sizmike.
Në Tiranë njerëzit dynden nëpër makina
Në kryeqytet është krijuar një kaos me trafikun teksa qytetarë të shumtë kanë dalë nga banesat për t’u vendosur në makinat e tyre, pasi i druhen lëkundjeve të tjera të tërmetit.
Trafiku në Tiranë
Epiqendra e tërmetit e cila ishte në Hamallaj të Durrësit ka shkaktuar panik gjithashtu edhe tek banorët e qytetit bregdetar, të cilët janë edhe më pranë vatrës së tërmetit, shto faktin që vitin e kaluar ky qytet u godit nga tërmeti shkatërrimtar ku vrau 51 persona.
Ashtu siç duket edhe në videot e dërguara në redaksinë e Fjala.al, qytetarët kanë dalë në rrugë bashkë me fëmijët nga frika e pasgoditjeve.
LEXO EDHE:
Sipas Ministrisë së Mbrojtjes nuk ka dëme materiale nga lëkundjet sizmike, e cila ishte me një thellësi prej 10 kilometrash dhe 29 kilometra nga Durrësi. Kjo është lëkundja më e fortë sizmike që godet sërish vendin tonë me epiqendër po në Durrës që pas atij të 26 nëntorit të vitit të kaluar që ishte 6.4 të shkallës rihter dhe që shkaktoi 51 viktima dhe dëme të shumta materiale. /Fjala.al/
LEXO EDHE:
Njihuni me 11 tërmetet më të fuqishme dhe më shkatërrimtare në botë
