Kosova një ditë më parë ka mbajtur zgjedhjet e përkohshme parlamentare, zgjedhje këto që u vlerësuan të drejta dhe demokratike.
Rekord të ri në historinë parlamentare të Kosovës ka vendosur Lëvizja Vetëvendosje e drejtuar nga Albin Kurti, në zgjedhjet e 14 shkurtit. Partinë që merr pjesë në zgjedhje vetëm prej vitit 2010, rezultatet preliminare e kanë nxjerrë me më shumë vota se LDK-ja e epokës së ish-presidentit Ibrahim Rugova në dy palë zgjedhjet e para të pasluftës.
LDK-ja atëbotë pati fituar 45.7 për qind (2001) dhe 45.42 (2004). Pas 20 vjetësh, LVV-ja ka fituar 47.69 për qind apo 320 mijë vota nga mbi 90 për qind të vendvotimeve të procesuara. Në koalicion me LVV-në ishte edhe lista e Vjosa Osmanit e cila ndau rrugët me LDK-në vitin e kaluar, thotë “Zëri”.
Rezultat historik të dobët kanë shënuar partitë që në periudha të ndryshme qeverisën vendin dy dekadat e kaluara. LVV-ja ka marrë vota më shumë se PDK-ja, LDK-ja e AAK-ja bashkërisht.
Mbështetur në rezultatet preliminare, PDK-ja ka fituar 17.36 për qind, LDK-ja 13.41 për qind, kurse AAK-ja 7.45 për qind.
Nisma e Fatmir Limajt nuk ka arritur ta kalojë pragun, duke mbetur në 3 për qind.
Është edhe një kontingjent i votave nga diaspora që nuk janë numëruar ende dhe mund ta ndryshojnë rezultatin përfundimtar.
Vetëvendosje ka dalë forcë e parë edhe në shumicën prej komunave të mëdha përfshirë Prishtinën, Podujevën, Prizrenin, Gjilanin, Ferizajn, Pejën e Gjakovën.
PDK-ja ka arritur t’i ruajë bastionet e saj në Skenderaj dhe Drenas.
Kurse LDK-ja nuk ka arritur të fitojë në asnjë komunë, duke dështuar edhe në bastionet e saj.
Ka dalë vetëm e dyta apo e treta edhe në komunat ku udhëheq në nivel komunal, sikurse në Pejë dhe Istog.
Dalja e qytetarëve në zgjedhjet e djeshme në Kosovë, ka qenë 45.06 për qind.
