Një ngjarje e rëndë ka ndodhur në një familje shqiptare në Zvicër. Mediat vendase kanë njoftuar se shtetasja me iniciale F.B 44-vjeçe ka gjetur vdekjen pasi është dhunuar nga bashkëshorti i saj. Ngjarja e rëndë ka ndodhur në Schafisheim Aargau, ku 44-vjeçarja u dhunua nga bashkëshorti i saj dhe u dërgua në spital, por nuk arriti të mbijetonte gjatë.
Fiona Strebel, zëdhënëse e zyrës së prokurorit publik Aargau, konfirmoi që viktima ka ndërruar jetë. “Tani kemi të bëjmë me një vrasje. Është urdhëruar autopsia”, ka deklaruar ajo.
Sipas policisë, autori i dyshuar i krimit është shtetasi me iniciale N. B. 46-vjeç. Gjykata ka urdhëruar paraburgim për një periudhë provizore prej tre muajsh. Ndërkohë ende po hetohet për shkakun e ngjarjes dhe sipas Strebel, burri nuk ka precedent penal në lidhje me dhunën në familje.
Sipas policisë së kantonit Aargau, një prej fëmijëve bëri një telefonatë urgjence pak pas mesnatës të së premtes.
Mjekët e ambulancës gjetën një grua të pajetë në shtrat, por patën sukses dhe e rikthyen në jetë, ndërsa burri u arrestua pa bërë rezistencë. Shqiptarja vdiq më pas në spital.
Një i afërm i 44-vjeçares është shtangur, familja gjithmonë dukej e lumtur.
Ata kanë dy vajza dhe një djalë. Ata e trajtonin njëri-tjetrin me shumë dashuri. Burri gjithashtu postonte rregullisht fotografi të gruas dhe fëmijëve të tij në Facebook.
Sipas një kushëriri të autorit të dyshuar, e gjithë familja në Kosovë është e shokuar. Ai vetë e njeh viktimën për një kohë të gjatë dhe se janë rritur bashkë. Disa të afërm thonë se çifti nuk kishte asnjëherë probleme.
