Pas mbërritjes së 60 mijë dozave kineze një ditë më parë, në Shqipëri ka rinisur vaksinimi masiv i popullatës. Gjatë 24 orëve të fundit, mësohet se janë vaksinuar 8 519 persona.
Sipas të dhënave të publikuara nga ministrja Ogerta Manastirliu, në total numri i të vaksinuarve ka shkuar në 725 135.
Janë më shumë se 830 mijë doza vaksine që janë administruar në Shqipëri, ndërsa objektivi i ri është realizimi i 1 milion vaksinimeve brenda Qershorit.
Koha për lirimin e masave?
Situata epidemiologjike në vend është përmirësuar ndjeshëm, ndërsa sot u raportua vetëm për 6 të infektuar dhe një të vdekur.
Numri i rasteve aktive me covid në Shqipëri ka rënë në 944, ku 505 prej këtyre rasteve janë në Tiranë.
Aktualisht në spitalet COVID po trajtohen 57 pacientë nga të cilët 7 pacientë janë në terapi intensive.
Duke iu referuarve treguesve, disa nga mjekët e njohur kanë bërë thirrje për një tjetër lehtësim të masave. Aktualisht nuk lejohet lëvizja e qytetarëve dhe aktiviteti i bareve dhe restoranteve nga ora 22:00 deri në 06:00.
