Të tjera detaje dalin në dritë nga arrestimi i prokurorit të Sarandës, Sali Hasa, pas hetimit një-vjeçar nga SPAK.
SPAK nisi hetimet që në vitin 2020 për një grup që kryente trafikim droge, por hetimi çoi në zbulimin e një rasti korrupsioni në drejtësi dhe të trukimit të ndeshjeve.
Çfarë e “fundosi” prokurorin Hasa?
Shkak për arrestimin e prokurorit është bërë dyshimi se ka pushuar akuzën e plagosjes për Emiljano Miranin, i akuzuar për plagosje të lehtë me dashje dhe mbajtje të armëve të ftohta.
Sipas informacioneve ai ka pushuar çështjen ndaj tij pas ndërhyrjes së motrës së të dyshuarit, Elsona Papa, e cila është lënë në “arrest shtëpiak”. Kjo e fundit dyshohet se i ka dhënë ryshfet prokurorit për të shpëtuar vëllain.
Në njoftimin e SPAK thuhet se gjykata ka caktuar masën e sigurimit “arrest në shtëpi”, për të hetuarën Elsona Papa, e dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim, parashikuar nga nenet 245/1/1 – 25 i Kodit Penal./GSH
