Këshilli i Ministrave ka miratuar vendimin për shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Ndërtimi i rrugës “Isuf Balta”, Tiranë”. Shpronësimi të bëhet në favor të Bashkisë Tiranë. Pronarët e pasurive të paluajtshme, që shpronësohen, për pasuritë e llojit “truall”, do të kompensohen në vlerë të plotë, sipas masës së kompensimit përkatës me vlerë të përgjithshme prej 51.3 milionë lekë. Ky fond shpronësimi do të përballohet nga fondet e Bashkisë Tiranë. Lista e përfituesve, të cilët do t’iu merret toka për ndërtimin e rrugës do të publikohet nga Bashkia e Tiranës
Sipas vendimit vlera e përgjithshme e shpronësimit për pasurinë e llojit “truall”, me vlerë 51 306 408 lekë, do të përballohet nga fondet e Bashkisë Tiranë. Ndërsa shpenzimet procedurale në vlerën 50 000 lekë do të përballohen nga buxheti i vitit 2020, miratuar për Ministrinë e Infrastrukturës dhe Energjisë, ndërsa shpenzimet procedurale në vlerën 1 557 508 lekë, për publikim në organet e shtypit, do të përballohen nga subjekti kërkues, Bashkia Tiranë.
Ndërkohë Agjencia Shtetërore e Kadastrës, Drejtoria Vendore Tiranë Veri, brenda 30 ditëve nga data e miratimit të këtij vendimi, në bashkëpunim me Bashkinë Tiranë, të fillojnë procedurat për hedhjen e gjurmës së projektit, mbi hartën kadastrale të regjistrimit, sipas planimetrisë së shpronësimit të miratuar dhe të bëjnë kalimin e pronësisë për pasuritë e shpronësuara në favor të shtetit.
