Këngëtarja e madhe e muzikës shqipe, Nexhmije Pagarusha ndërroi jetë në moshën 86-vjeçare. Lajmin e kanë bërë të ditur vetë familjarët e saj. Menjëherë pas këtij lajmi kanë vërshuar dhe mesazhet e ngushëllimit.
“Unë isha fatlum ta njihja nga afër dhe të ndaja me të shumë momente të bukura dhe të paharrueshme. Ajo nuk ishte magjike, vetëm në skenë dhe ekran, por në çdo moment të jetës së saj”. Kështu shkruan Presidenti i Shqipërisë, Ilir Meta, ne reagimin e tij.
‘Si një nga përfaqësueset më të mëdhaja të artit e muzikës, e nderuar dhe vlerësuar ndërkombëtarisht, me trashëgiminë e vyer që la pas, Nexhmije Pagarusha do të mbetet e paharruar për të gjithë ne”- shkruan Meta, duke u dërguar ngushëllime familjareve te saj.
Pas vdekjes së këngëtares së madhe ka reaguar edhe kryeministri Edi Rama.
“Një zë i rrallë dhe një zonjë e rrallë, Nexhmije Pagarusha, nuk është më mes nesh, por brenda i pashlyeshëm mbetet kujtimi i saj.
Prehu në paqe zonjë e madhe”, shkruan kryeministri Edi Rama, në një postim në Facebook.
