Luftëtarët opozitarë, besnikë ndaj qeverisë së përmbysur të Afganistanit rimorën të premten tre lagje veriore nga talebanët vetëm disa ditë pasi grupi islamik rivendosi kontrollin e tij mbi pjesën më të madhe të vendit. Gjithashtu sot milicitë afgane i dëbuan talebanët nga pjesë të provincës Baghlan, të vendosura rreth 160 kilometra në veri të kryeqytetit. Rreth 30 luftëtarë talebanë u vranë dhe 20 të tjerë u kapën, sipas asaj që raportojnë mediat ndërkombëtare.
Abdul Hamid, komandant lokal i asaj që u përshkrua si një kryengritje kundër talebanëve, tha në një video mesazh nga Andrab, një nga rrethet e sapo mbajtur, se forcat e tij po përparonin drejt një rrethi tjetër aty pranë, duke u zotuar të kapte të gjithë Baghlan. Talebanët thuhet se kanë dërguar forcat e tyre në Andrab për të organizuar një kundërsulm. Sundimtarët e rinj të Kabulit nuk kanë komentuar humbjen territoriale, por mediat vënë në dukje një deklaratë nga një llogari pro-talebane në Twitter që pretendonte se 15 luftëtarë talebanë ishin vrarë dhe 15 të tjerë ishin plagosur. “Të gjithë ata që kanë kryer këtë krim duhet të vriten. Dyert e bisedës janë të mbyllura”, thuhej në deklaratë.
