Shqiptarët e Kosovës kanë nisur të imitojnë shqiptarët e Shqipërisë për sa i përket krimit të rrugës. Janë një sërë ngjarjesh njëra pas tjetrës që e dëshmojnë këtë fakt, ndërkohë mbrëmë është shënuar një akt i rëndë që në fakt në Shqipëri ndodh thuajse për ditë. Dy persona të armatosur dhe të maskuar kanë hyrë në një market dhe pasi kanë ushtruar dhunë mbi të zotin e dyqanit i kanë marrë atij të gjitha paratë që kishte në arkën e biznesit.
Mediet vendase bëjnë me dije se një ngjarje e rëndë ka ndodhur në një biznes privat, ku grabitësit morën mbi 1500 euro nga dyqani, më pas kanë torturuar edhe pronarin e dyqanit. Ngjarja ka ndodhur në Vrellë të Komunës së Istogut, ku rreth orës 8 të mbrëmjes së djeshme, papritmas pronarin e dyqanit Arben Dreshajn, diçka jo e zakonshme e shqetësoi.
Një veturë me shpejtësi u ndal para dyqanit të tij, nga këtu dolën dy persona të maskuar e të armatosur të cilët u futën në dyqan. Duke i drejtuar armën Arben Dreshajt e shtynë në një qosh, e më pas filluan të ushtrojnë dhunë ndaj tij. Ata e tërhoqën zvarrë pronarin, siç shihet edhe në video, deri tek arka, ku siç shihet edhe në kamerat e sigurisë të siguruara nga T7, këta dy keqbërës morën edhe paratë që ishin aty.
Pronari Arben Dreshaj ka rrëfyer tmerrin që përjetoi një natë më parë, ku thotë se u mundua të rezistojë por një gjë të tillë e kishte të pamundur. Në vendin e ngjarjes ka shkuar edhe policia e cila shoqëroi Arben Dreshajn në spital, ku mori trajtim mjekësor. Policia ka konfirmuar rastin, por kanë bërë me dije se deri me tani nuk ka të arrestuar për këtë vepër.
