Çështja e vdekjes së Kostandinos Kacifas, shtetasi shqiptar nga minoriteti, vijon të jenë në fazën e hetimeve paraprake dhe prokuroria nuk ka dalë ende në asnjë konkluzion ndryshe nga çfarë pretendohet në lajmet e bëra publike në disa media.
Kostandinos Kacifas humbi jetën më 28 tetor të vitit 2018 në fshatin Bularat të Gjirokastrës, ku dhe qëlloi me breshëri kallashnikovi në drejtim të policisë shqiptare.
Ngjarja e rëndë u shënuar më 28 tetor të 2018 ku në fshatin Bularat festohej dita e dëshmorëve të Greqisë. Kostandinos Kacifa me anë të një kallashnikovi të modifikuar edhe me dylbi, qëlloi mbi efektivët e policisë që ishin në zonë për mbarëvajtjen e ceremonisë. Ndërkohë pasi kësaj ngjarje u thirr për ndihmë reparti RENEA ku pas disa orësh ndjekje dhe shkëmbi zjarri, u njoftua se Kostandionos Kacifa mbeti i vrarë. Kjo ngjarje për një kohë solli edhe tensione politike mes dy shteteve, ndërkohë familja e Kacifas vijon të hedhë akuza mbi RENEA-n për vrasjen e djalit të tyre.
Në media u raportua sot se Kostandinos Kacifas nuk është vrarë nga forcat RENEA por është vetëvrarë, madje “me dy plumba”.
Prokuroria pranë Gjykatës së Shkallës së Parë Gjirokastër në një reagim sqaron se “Në Prokurorinë pranë Gjykatës së Shkallës së Parë Gjirokastër, është regjistruar proçedimi penal nr. 824 në datën 24.12.2019, pas transferimit të akteve nga Prokuroria pranë Gjykatës së Shkallës së Parë për Krimet e Rënda. Ky proçedim penal bën fjalë për ngjarjen ku ka humbur jetën shtetasi Kostandinos Kaçifas.
Ky proçedim penal vazhdon të ndodhet në fazën e hetimeve paraprake dhe nga ana jonë nuk është arritur në asnjë konkluzion në lidhje me zgjidhjen e çështjes. Kjo çështje penale është regjistruar për veprat e parashikuara nga nenet 79/dhe 22, 278/1 e 76 të K.Penal“.
Drejtuesi i prokurorisë, Julian Çafka, nënvizon se çdo informacion i publikuar në media, pa ju referuar burimeve zyrtare, dëmton rëndë hetimet dhe nuk kontribuon në zgjidhjen e drejtë të çështjes.
Prokuroria pranë Gjykatës së Shkallës së parë Gjirokastër siguron publikun se do të kryejë hetimin me objektivitet e paanësi dhe do të parashtrojë zgjidhjen e drejtë të kësaj çështjeje penale.
