Kryetari i Partisë Demokratike, Lulzim Basha ka reaguar për atë të cilën e konsideron si sulm të kryeministrit Edi Rama kundrejt politikanëve në Kosovë.
Duke komentuar qëndrimet e Ramës në “Samitin e Durrësit”, Basha e cilësoi fjalën e e kreut të qeverisë ndaj liderve të politikës kosovare si “akt rrugaçëror”.
“Akt i denjë vetëm për një peng të antishqiptarizmit si Edi Rama. Dënoj sulmin rrugaçëror të Edi Ramës kundër liderëve politikë të Kosovës dhe shpreh ndjesë në emër të çdo shqiptari për këtë akt të papranueshëm! Gjuha e urrejtjes ndaj institucioneve të Kosovës është akt i denjë vetëm për një peng të antishqiptarizmit si Edi Rama! Kosova është shtet i pavarur dhe Shqipëria ka detyrimin të promovojë dhe respektojë pavarësinë e Kosovës dhe institucionet e saj. Koha e vasalitetit të autokratit të korruptuar të Tiranës ndaj armiqve dhe kundërshtarëve të pavarësisë së Kosovës do të marrë fund shumë shpejt!”-shpreht Basha në një reagim në facebook.
Kryeministri Edi Rama ishte mjaft kritik për klasën politike Kosovare, duke e konsideruar veprim të papërgjegjshëm refuzimin për të marrë pjesë në Samitin e Durrësit, për nismën që njihet si “Mini-Shengeni Ballkanik”.
