Chelsea do të presë në “Stamford Bridge” Tottenham-in në derbin e Londrës që do të luhet në javën e dytë të Premier Ligës. Trajneri i “Bluve”, Tomas Tuchel, duket se i ka idetë e qarta për formacionin që do të hedhë në fushë dhe sulmuesi i kombëtares shqiptare, Armando Broja, pritet ta nisë nga stoli.
Gjithsesi duket se një pjesë e mirë e tifozëve të Chelsea-s, duan që 20-vjeçari shqiptar të jetë titullar në këtë përballje.
Arsyeja është sepse ata e shohin si një talent premtues për skuadrën dhe kërkojnë që të arrijë sa më shpejtë potencialin e tij, duke i besuar më shumë minuta në këmbë.
Me anë të një postimi në Twitter, njëri prej tyre u shpreh: “Kjo skuadër e Chelsea-s është plot me lojtarë të shtrenjtë dhe të talentuar. Gjithsesi, aty është një lojtar që unë dua ta shikoj të startojë përballë Spurs-ave këtë fundjavë dhe nuk ka kushtuar asnjë qindarkë. Ai njeri është Armando Broja. Është koha e tij!”.
Një tjetër arsye pse tifozët duan që sulmuesi shqiptar të jetë në fushën e lojës pikërisht përballë Conte-s, është se në sezonin e shkuar, Broja ishte protagonist me një gol në fitoren e ish-skuadrës së tij Southampton-it kundër Tottenham-it në transfertë.