Tirana U-17 ka fituar finalen e Kupës së Shqipërisë ndaj Partizanit U-17 në atë që ishte një derbi i vërtetë.
Bardheblutë kanë shkatërruar të kuqtë e kryeqytetit me rezultatin 4-0 e ja kanë dalë që të marrin trofeun e Shqipërisë.
Kjo finale është dominuar e tëra nga ekipi i Tiranës, ndërsa golat kanë pasur si autorë Mecullin në minutën e 11 dhe në minutën e 57 dhe Bircajn në minutën e 65-ë dhe në atë të 86, duke realizuar të dy dopieta dhe së bashku bën një poker për bardheblutë.
Në këtë takim U-17 e Tiranës vinte pas fitores 7-1 me Dinamon, barazimit 0-0 me KF Shkodra dhe kualifikimit me penallti, ndërsa në gjysmëfinale eliminuan Shënkollin në shifrat 4-0.
Ndërsa U-17 e Partizanit vinte në këtë finale pasi mposhti Apoloninë 2-0, më pas fitoi 3-0 ndaj Skënderbeut, në shifrat 1-0 eliminoi Vllazninë në çerekfinale, ndërsa në gjysmëfinale skuadra e trajnerit Pelinxhi mposhti “Football Republic” me rezultatin 2-1.
Ditën e dielë do të luhet finalja për Kupën e Shqipërisë për skuadrat e U-19, takim në të cilin Tirana do të ketë përballë skuadrën e Shënkollit, ndërsa e premtja do të sjellë derbin më të madh në vend atë të ekipeve të para të Tiranës dhe Partizanit, sfidë që është e vlefshme për javën e 24-t të Superligësë./Fjala.al/
