Kryeministri Edi Rama ka postuar një foto në rrjetet sociale, në vendin ku pritet të mbërrijnë liderët e BE-së dhe më pas të zhvillohet mbledhja e samitit të përbashkët me vendet e Ballkanit Perëndimor.
“Mirëmëngjes nga Shqipëria Europiane”-shkruan kryeministri në postimin e bërë.
Në këtë samit, do të jenë të pranishëm 27 liderë evropianë, shoqëruar nga delegacionet përkatëse.
Një pjesë e liderëve kanë mbërritur në kryeqytetin shqiptar të hënën, një ndër to, edhe Presidentja e Kosovës, Vjosa Osmani.
Për shkak të zhvillimit të samitit, Policia e Shtetit ka shtuar masat e sigurisë duke ‘blinduar’ kryeqytetin.
Në kuadër të masave për mbarëvajtjen e sigurisë do të bllokohen plotësisht disa rrugë dhe do vendoset një perimetër sigurie, që nisi aktivizimin në datën 5 dhjetor në orën 14:00.
Ndërkohë, krahas samitit, do të zhvillohet një protestë, e thirrur nga Partia Demokratike. Kreu i kësaj force politike, Sali Berisha ka thënë se protesta do të mbahet në orën 12:00 para Kryeministrisë.
