Presidenti i Serbisë, Aleksandër Vuçiç, deklaroi se në mbledhjen e sotme të qeverisë është marrë vendim unanim që kërkesa për kthimin e forcave të sigurisë serbe në Kosovë të dorëzohet sonte në formë elektronike, ndërsa nesër në mëngjes në vendkalimin administrativ dhe zyrtarisht komandës së KFOR-it.
“Kërkesa është në përputhje me Rezolutën 1244 të OKB-së për kthimin e një numri të caktuar nga qindra në një mijë në Republikën e Kosovës. Vendimi është marrë unanimisht me respektimin e së drejtës ndërkombëtare”, sqaroi Vuçiç, i cili mori pjesë në seancën e Qeverisë me ftesë të kryeministres.
Vuçiq tha për RTS se në këtë moment do të ishte e rëndësishme që forcat e sigurisë serbe të kthehen për mbrojtjen e popullatës serbe dhe mbi të gjitha për atë që parashikohet në Rezolutën 1244 të OKB-së, që është kontrolli në vendkalime.
“Do të ishte një vendim i mirë. Por, në bazë të të gjitha deklaratave të deritanishme jemi pothuajse të sigurt se nuk do të pranohet, por presim të shohim”, tha ai.
Vuçiç nënvizoi se kjo është hera e parë që një qeveri serbe merr një vendim të tillë, me iniciativën e tij.
Ai vuri në dukje se kishte pretendime se qeveria e Zoran Gjingjiç e bëri këtë në vitin 2003, por shtoi se kryeministri i atëhershëm Gjingjiç bëri një lëvizje politike dhe i dërgoi një letër Këshillit të Sigurimit të OKB-së, por pa një kërkesë zyrtare.
