Kreu i Komunitetit Mysliman Bujar Spahiu ka thënë përmes një video-mesazhi se emigrimi i shqiptarëve është një plagë që po gërryen vendin.
Ai u shpreh se shqiptarët, kryeisht rinia po ikin nga një vend, që Zoti i ka dhënë shumë begati e pasuri.
Sipas tij ky largim masiv është nga fatkeqësitë më të mëdha që mund t’i bjerë një kombi sepse rrezikon deri edhe ekzistencën.
Spahiu: Do të flasim për një plagë që po gërryen vendin, emigrimi. Emigrimi është një fenomen shumë i hershm mbarë botëror. Popujt kanë lëvizur dhe lëvizin gjithmonë, disa ikin nga lufta dhe disa të tjerë ikin për një jetë më të mirë, disa për të marrë apo përhapur dije. Në fenë islame cështjet marrin vlerë dhe kuptim sipas qëllimit. Veprat varen sipas qëllimit. Ai i cili ka emigruar për hir të Allahut dhe të dërguarit, emigrimi i tij konsiderohet i tillë. Qëllimi është ajo esenca që ndanë gjërat. Ne të gjithë e shohim se fenomeni i braktisjes së vendit sa vjen e shtohet. Unë lëviz shpesh për shkak të detyrës dhe shoh që fshatra e qytete të tëra janë heshtur.
Nuk sheh më harenë e fëmijëve të cilët ikin e vijnë nepër shkolla, nuk sheh më vitalitetin e të rinjve që gjallojnë. Është një situatë e trishtë. Shqiptarët ikin për qëllime ekonomike, ky është qëllimi kryesor. Shqiptarët po ikin nga një vend të cilit Zoti i lartmadhërishëm i ka dhënë shumë begati, klimë e pasuri natyrore me bollëk.Ky largim masiv është nga fatkeqësitë më të mëdha që mund t’i bjerë një kombi sepse rrezikon deri edhe ekzistencën. Efektet e këtij largimi masiv janë duke u ndjerë në çdo qytet e fshat të vendit.
Pasojat e largimeve të tilla janë afatgjata dhe tepër domethënëse në tkurrjen e popullsisë. Ne jemi dëshmitarë të këtyre pasojave. Brezi i parë i emigrantëve ruajnë gjithmonë ëndrrën për t’u kthyer në vendin e tyre. Por fëmijët e tyre jo. Ata integrohen në një shoqëri në të cilën janë lindur dhe rritur dhe atdheu i tyre iu bëhet i huaj. Të rinjtë duhet të përpiqen me të gjitha mënyrat që të përmirësojnë gjendjen e vendit tonë. Dorëzimi nuk është zgjidhje. Pasibviteti nuk është zgjidhje.
