Allison Guerriero, ish e dashura e Charles McGonigal zbuloi çdo gjë të dyshimtë që vuri re tek ish zyrtari i FBI, duke përmendur edhe shifrën 80 mijë dollarë që i gjeti në çantë. Në një intervistë për ‘Bussines Insider’ tregon se mëngjesin e tetorit 2017 vuri re çantën plot me para dhe e pyeti se ku i kishte gjetur.
“Ku dreqin e gjete këtë?” ishte pyetja që i bëri Allison.
“Oh, e mban mend atë ndeshjen e bejsbollit? Unë vura dhe një bast dhe fitova”, ishte përgjigja e McGonigal duke mos i treguar ish të dashurës burimin e vërtetë të parave. Këtë shifër të konsiderueshme dyshohet se e mori më 5 tetor 2017 në një makinë të parkuar jashtë një restoranti nga ish punonjësi i inteligjencës shqiptare, Agron Neza.
Guerriero ishte 44 vjeç kur u takua me McGonigal, atëherë 49 vjec dhe sapo kishte nisur punën e tij në zyrën e FBI në Nju Jork. Ajo zbulon se lidhja e tyre zgjati rreth një vit dhe shkonin në ristorante luksoze. Po ashtu, McGonigal nuk kursente dhuratat e shtrenjta por edhe shifrat e parave nga 500 deri në 1000 dollarë që ia jepte për ditëlindje e Krishtlindje.
Guerriero kujton se McGonigal përdorte edhe mjetet e FBI-së për marrëdhënien e tyre. Sipas saj, kishte raste kur kryenin marrëdhënie intime në fuoristradën e FBI. Pasi u diagnostikua me kancer gjiri, McGonigal e mbështeste dhe kujdesej që të merrte trajtim mjekësor ndonëse nuk hezitonte ta mashtronte për ‘letrat e divorcit’.
Në fund të vitit 2018, McGonigal dhe Guerriero u ndanë. Ajo kujton se mori një letër anonime në postë. McGonigal i thoshte se ende ishte i martuar dhe nuk donte të divorcohej nga gruaja e tij.
“U trondita. Isha shumë e dashuruar me të dhe isha shumë e lënduar”, tha Guerriero, inati i së cilës arriti që t’i dërgonte një email kreut të FBI në Nju Jork, William Sweeney, të cilit i tregoi lidhjen jashtëmartesore me ish zyrtarin e FBI dhe marrëdhëniet e tij në Shqipëri. Kjo bëri që të niste hetimi për Charles McGonigal.
