Psikiatrja Arjana Rreli është shprehur ndotja e ajrit ndikon në uljen e përqendrimit dhe në memorien e fëmijëve.
E ftuar në emisionin “Good Morning Albanians” në Euronews Albania, ajo tha se ndotja e ajrit ndikon më shumë tek fëmijët dhe tek moshat mbi 60-vjeç.
“Subjektet më vulnerabël janë fëmijët dhe moshat mbi 60-vjeç. Të mendosh se fëmijët janë më të ekspozuar nga humbja e përqendrimit e kjo do të thotë se ti pret një brez që do të ketë një koeficient intelektual më të ulët, shoqëruar patjetër dhe me uljen e përqendrimit e memories”- tha ajo.
Por ekspozimi afatgjatë ndaj ndotjes së ajrit është lidhur edhe me një rrezik më të lartë të depresionit dhe ankthit.
Studiuesit nga Universiteti i Pekinit analizuan të dhënat e 389,000 njerëzve në Mbretërinë e Bashkuar gjatë 10 viteve. Ekspozimi vjetor ndaj ndotjes së ajrit u vlerësua për secilin pjesëmarrës, duke përfshirë PM2.5 grimca të vogla që janë aq të vogla sa mund të kalojnë përmes mushkërive në qarkullimin e gjakut dhe dioksidi i azotit, i cili emetohet nga automjetet.
