-Koronavirusi/ Dekreti ekstrem, karantinohet veriu i Italisë, të paktën 10 mln njerëz do ‘kyçen’
Kompanitë ajrore që veprojnë në Shqipëri kanë filluar të anulojnë fluturimet e para drejt Italisë. Vendimi vjen pas dekretit të firmosur nga kryeministri Italian, Guiseppe Conte për shpalljen e rajonit të Lombardisë dhe 14 provincave të tjera si zona karantine, për të parandaluar shpërndarjen e koronavirusit.
Në faqen zyrtare të aeroportit ‘Nënë Tereza’ njoftohet se janë të paktën tre fluturime drejt Italisë që janë anuluar sot. Bëhet fjalë për linjën ‘Air Albania’, e cila ka anuluar fluturimet e parashikuara drejt Romës, në 05:30, atë drejt Milanos, në orën 11:15, dhe drejt Bolonjës, në orën 18:20.
Ndonëse zyrtarisht nuk konfirmohet një lidhje midis koronavirusit dhe anulimeve të fluturimeve, Air Albania nuk konfirmon gjithashtu se nesër udhëtimet do të vijojnë normalisht. Të gjithë personat që kanë prerë biletë për këto destinacione duhet të kontaktojnë me kompaninë.
Ndërkohë, Blue Panorama dhe Alitalia nuk i kanë anuluar fluturimet e parashikuara për sot drejt Bergamos dhe Romës. Mësohet se Blue Panorama ka edhe një fluturim nga Malpensa drejt Tiranës në orën 14:00.
