Ish-kryeministri i Kosovës, Ramush Harandinaj ka rrëfyer detajet nga takimi me presidentin Hashim Thaçi, lidhur me qëndrimin ndaj Serbisë, taksës dhe domosdoshmërisë për një unitet kombëtar.
Haradinaj shkruan se ai ka bërë të qartë presidentit Thaçi se nëse diskutohet territori i Kosovës në tryeza të ndryshme me Serbinë dhe hiqet 100 për qind taksa ndaj Beogradit atëherë gjithçka ka dështuar.
Pas takimit të sotëm me kreun e shtetit, Harandinaj thekson se vetëm të bashkuar në interesin shtetëror mund ta forcojnë Kosovën përballë Serbisë.
Ndërkaq, ai shprehet se do t’u drejtohet me ftesa individuale për takim të gjithë kryetarëve të partive parlamentare të Kosovës, për të filluar përgatitjet rreth Konferencës së Unitetit për Dialog.
“Meqë as sot nuk u dakorduam për një material/qëndrim, në vazhdën e iniciativës sime të djeshme, do t’u drejtohem me ftesa individuale për takim të gjithë kryetarëve të partive parlamentare të Kosovës, për të filluar përgatitjet rreth Konferencës së Unitetit për Dialog, prej nga do të dalim me qëndrim unik politik, para se të na bëhet vonë”, ka thënë Haradinaj.
Postimi i plotë i Haradinajt: “Sot Presidentit Thaçi ia sqarova qëndrimin tim dhe të AAK-së se vetëm unik e të bashkuar në interesin shtetëror, e forcojmë Kosovën përballë Serbisë. Po ashtu ritheksova bindjen e palëkundur se nëse Kosova prapë bëhet subjekt në biseda rreth territoreve, e jo palë e barabartë siç është sot me taksën 100%, i gjithë epilogu për marrëveshje përfundimtare për njohje reciproke mes Kosovës e Serbisë do të jetë i dështuar. Meqë as sot nuk u dakorduam për një material/qëndrim, në vazhdën e iniciativës sime të djeshme, do t’u drejtohem me ftesa individuale për takim të gjithë kryetarëve të partive parlamentare të Kosovës, për të filluar përgatitjet rreth Konferencës së Unitetit për Dialog, prej nga do të dalim me qëndrim unik politik, para se të na bëhet vonë.
