Kreu “de facto” i PD-së Sali Berisha reagoi ashpër pas vendimit të Gjykatës së Apelit, duke akuzuar kryeministrin Rama si personin që vendosi për këtë çështje. Berisha: “Vendimi i gjykatës u shkrua në zyrën e Ramës”.
Ish-kryeministri Sali Berisha ka sulmuar Gjykatën e Apelit për vendimin e marrë për fatin e Partisë Demokratike. Berisha ka akuzuar gjyqtarët se kanë marrë vendimin me urdhër të Edi Ramës dhe e kanë mbajtur 9 muaj qëllimisht që ta bënin 3 ditë para regjistrimit në zgjedhjet vendore 2023. Nga selia e PD-së, Berisha sulmoi gjyqtarët pas vendimit të Apelit për të zhbërë vendimin e gjyqtarit Agron Zhukri dhe kthimin në gjykatën e Shkallës së Parë çështjen e Partisë Demokratik.
Berisha u shpreh se vendimin e kishin në sirtar dhe ishte një vendim i përgatitur nga Edi Rama. “Sot (dje), tre gjykatës në një proces të pashembullt kundër pluralizmit, lexuan vendimin e përgatitur kohë më parë, në zyrën e Ramës. Vendimi ishte paralajmëruar kohë më parë, trup diplomatik të akredituar në Tiranë. Por sot (dje) gjithashtu jemi në një orë, në një kohë, të vërtetë, kam besimin më të madh se demokratët shqiptarë, janë të vendosur të mbrojnë me çdo kusht dhe çdo çmim pluralizmin dhe të ardhmen.
Vazhdimi i skenarit të filluar me tradhtarin e kombit McGonigal konkludoi me një vendim të pashembullt. Në procesin gjyqësor të sotëm, se ata të cilët kishin kërkuar të shpalleshin palë, i thanë gjykatës se nuk kishin qenë palë, por gjykatësit lexuan vendimin e shkruar në zyrën e Edi Ramës dhe anuloi tre ditë pasi e mbajtën 9 muaj, pas skadimit të afatit të regjistrimit në zgjedhje vetëm se ishte urdhëruar nga Rama”, tha Berisha.
Për këtë vendim dekurajues për simpatizantët e Partisë Demokratike, Berisha kishte një mesazh. “U bëj thirrje anëtareve të PD-së të ndihen në lartësinë e misionit të tyre historik misionit të shpëtimit të pluralizmit të demokracisë të shoqërisë shqiptare. Çdo shqiptar pret nga ne realizimin e këtij misioni. Unë kam besim të madh se siç kapërcyen me mënyrën më legjitime më të vendosur të gjitha përpjekjet për asgjësimin tonë në do të kapërcejmë çdo pengesë dhe vështirësi”, tha Berisha. Sipas tij, “të mendosh, të diktosh me tre gjykatës të cilët i gjen dhe urdhëron të lexojnë një vendim të parapërgatitur në zyrat e tua, mban të gjithë përgjegjësinë dhe dëshmon se je njëlloj si baba yt biologjik, daja yt biologjik, një xhelat i të vërtetave, normave demokratike, lirisë, dhe meriton çdo ndëshkim”. Ndër të tjera Berisha tha se PD-ja është një parti më e fuqishme se kurrë.
“Ajo do të mbledhë këto ditë forumet e saj dhe mbi bazën e këtij qëndrimi armiqësor, asgjësues të shpallur nga narkoshteti dhe Edi Rama, do të marrë të gjitha vendimet e duhura për të vazhduar misionin e saj në mënyrën më të fuqishme”, tha Berisha.
