A është kafeja e mirë apo e keqe? Me sheqer apo pa? Sa filxhanë në ditë?
Studimet e mëparshme mbi efektet shëndetësore të kafesë kanë zbuluar se konsumimi i kafesë lidhet me një rrezik më të ulët të vdekjes, por ata nuk bënë dallimin midis kafesë së pa ëmbëlsuar dhe kafesë së konsumuar me sheqer ose ëmbëlsues artificialë.
Kësaj pyetje i jep përgjigje një studim i ri i madh i botuar në Annals of Internal Medicine, i cili tregon se konsumimi i zakonshëm i kafesë (dhe efekti është vërejtur për të gjitha llojet e kafesë, duke përfshirë kafenë pa kafeinë) redukton vdekshmërinë nga të gjitha shkaqet, edhe nëse sheqeri i shtohet pijes.
Rezultatet për ata që përdorën ëmbëlsues artificialë, ishin më pak të qarta.
Studiuesit në Universitetin Mjekësor Jugor në Guangzhou, Kinë, kryen studimin duke analizuar përgjigjet e pyetësorëve nga më shumë se 171,000 njerëz nga Britania e Madhe (pa sëmundje të zemrës ose kancer) të cilëve iu bënë pyetje rreth sjelljes dietike dhe shëndetësore për të përcaktuar zakonet e konsumimit të kafesë.
Pjesëmarrësit u ndoqën për gati shtatë vjet dhe, në fund të vëzhgimit, u zbulua se rreziku i vdekjes në mesin e të gjithë konsumatorëve të zakonshëm të kafesë (me sheqer, ashtu dhe pa sheqer) ishte rreth 30% më i ulët se tek ata që nuk e bënin këtë.
E ËMBËL APO E HIDHUR? Në mënyrë të veçantë, pjesëmarrësit që pinin çdo sasi kafeje të pa ëmbëlsuar gjatë gati shtatë viteve kishin 16 deri në 21 për qind më pak gjasa të vdisnin sesa pjesëmarrësit që nuk pinin kafe.
Dhe ata që pinin 1.5 deri në 3.5 filxhanë në ditë kafe të ëmbëlsuar me sheqer ( rreth një lugë çaji sheqer për filxhan) kishin 29 deri në 31 përqind më pak gjasa të vdisnin sesa pjesëmarrësit që nuk e pinin atë.
Megjithatë, rezultatet në lidhje me efektet shëndetësore të konsumuesve të kafesë me shtimin e ëmbëltuesve artificialë ishin jopërfundimtare.
NGA 2 DERI 4 FILXHANË NË DITË. Sipas autorëve të studimit, pra, pirja e dy deri në katër filxhanë kafe në ditë duhet të jetë pjesë e zakoneve të mira për të qëndruar të shëndetshëm. Siç dihet, gratë shtatzëna dhe ato në gji duhet të shmangin pirjen e kafesë, si dhe ato me probleme të veçanta shëndetësore për të cilat pija nuk rekomandohet nga mjeku apo specialisti.
