Euro dhe monedhat e tjera të huaja kanë nisur rimëkëmbjen. Sipas kursit zyrtar të publikuar nga Banka e Shqipërisë, euro është këmbyer këtë javë mesatarisht 107.87 lekë, duke u shitur me 107.41 dhe blerë me 108.31 lekë.
Që nga fillimi i këtij viti, kur preku nivelin më të lartë prej 117.46 lekë, monedha e përbashkët europiane ka regjistruar një zhvlerësim të shpejtë prej gati 12 lekësh.
Me të njëjtën ecuri ka vijuar edhe dollari amerikan, i cili më 6 janar preku pikën më të lartë prej 111.75 lekë dhe më 9 qershor atë më të ulët prej 98.07 lekë.
Rënia e këtyre dy valutave kryesore botërore u detyrohet prurjeve të mëdha të valutës në treg.
Sektori që është prekur më shumë nga zhvlerësimi i euros, por edhe i dollarit amerikan, janë eksportuesit, përfshirë këtu ata të shërbimeve dhe mallrave në vend.
