Kur një balenë ngordhi në një plazh në ishullin Kanarie të La Palma, askush nuk e imagjinonte se një thesar i vlefshëm ishte fshehur në zorrët e saj.
Antonio Fernández Rodríguez, kreu i institutit të shëndetit të kafshëve dhe sigurisë ushqimore në Universitetin e Las Palmas, Spanjë ishte i vendosur të zbulonte pse balena kishte ngordhur. Duke dyshuar për një problem të tretjes, ai inspektoi zorrën e trashë të saj dhe ndjeu se diçka e fortë ishte ngjitur në atë pjesë të zorrëve.
Ajo që nxora ishte një gur me diametër rreth 50-60 cm që peshonte 9.5 kg.
Ky gur ishte një substancë e rrallë, e njohur shpesh si ari lundrues, me vlerë rreth 500,000 euro.
Balenat hanë sasi të mëdha kallamarësh dhe sepje, shumica e të cilave nuk mund të treten. Por disa mbeten, dhe me kalimin e viteve lidhen së bashku në zorrët e balenës për të formuar gurë. Këta gurë në shumicën e rasteve bien në det, por ndonjëherë, si në rastin e balenës në La Palma, ajo rritet shumë, duke çarë zorrën dhe duke vrarë balenën.
Raporti i përgatitur nga ekipi i Universitetit të Gran Canaria tregon se balena, me një gjatësi prej afërsisht 13 metrash, peshonte 20 tonë, midis 5 dhe 10 tonë nën mesataren. Përveç kësaj, mungesa e ushqimit të mjaftueshëm në stomak ishte një tjetër faktor i rëndësishëm që tregoi shkaqet e ngordhjes së saj.
