5 persona, mes tyre edhe të mitur, ngecën sot në det me 3 mjete lundruese kajakë dhe e kishin të pamundur kthimin në breg.
Ata kishin humbur kontrollin mbi drejtimin e tyre në zonën e “Ranës së Hedhun” dhe ishin larguar shumë nga bregu, për shkak të erës së fortë që po frynte.
Menjëherë pas marrjes së njoftimit janë organizuar shërbimet e Policisë Kufitare, për t’iu shkuar në ndihmë, me mjet lundrues.
Pasi kanë shkuar te 5 personat e mbetur në det, punonjësit e Policisë i kanë shoqëruar ata, me mjetin e Policisë Kufitare, deri në breg, së bashku me mjetet e tyre lundruese. Të 5 personat janë në gjendje të mirë shëndetësore.
