Nënë Mari Tereza Bojaxhiu e njohur si Nënë Tereza ndërroi jetë më 5 shtator të vitit 1997. Çdo vit bota përkujton 5 shtatorin, ditën kur ajo u nda nga jeta.
Nënë Tereza, një murgeshë e nderuar e cila gjithë jetën ia kushtoi kujdesit ndaj të sëmurëve dhe njerëzve në nevojë, mbetet një nga humanitaret më të nderuara në histori për shërbimin e saj.
Ajo ka lindur më 26 gusht 1910, në Shkup, që sot është kryeqyteti i Maqedonisë së Veriut. Përpjekjet e saj të jashtëzakonshme në betejën kundër varfërisë globale i dhanë asaj Çmimin Nobel për Paqe në vitin 1979.
Më 13 mars 1997, Nënë Tereza dha dorëheqjen si kryetare e Misionarëve të Bamirësisë, kongregacioni fetar që ajo themeloi. Ajo ndërroi jetë më 5 shtator të po këtij viti.
Në njohje të shërbimit të saj të jashtëzakonshëm ndaj të varfërve, pavarësisht nga përkatësitë e tyre fetare, qeveria indiane nderoi Nënë Terezën me një funeral shtetëror.
Për nder të saj, Kombet e Bashkuara caktuan 5 shtatorin si Ditën Ndërkombëtare të Bamirësisë.
Këtu janë 10 citate frymëzuese nga ajo:
“Ji besnik në gjërat e vogla, sepse në to qëndron forca jote.”
“Gëzimi është një rrjet dashurie në të cilën mund të kapësh shpirtrat.”
“Puna pa dashuri është skllavëri.”
“Ju mund të shëroni botën, duke nisur nga familja juaj”
“Ne vetë mendojmë se ajo që po bëjmë është vetëm një pikë në oqean. Por oqeani do të ishte më i vogël për shkak të asaj pike që mungon.”
“Po, duhet ta jetosh jetën bukur dhe të mos lejosh që fryma e botës, pasuria dhe kënaqësia të bëjnë të harrosh se je krijuar për gjëra më të mëdha”.
“Duhet të dimë se jemi krijuar për gjëra më të mëdha, jo vetëm për të qenë numër në botë, jo vetëm për diploma, këtë punë e atë punë. Ne jemi krijuar që të duam dhe të na duan”.
“Dikur besoja se lutja i ndryshon gjërat, por tani e di që lutja na ndryshon neve dhe ne i ndryshojmë gjërat.”
“Të jesh i padëshiruar, i padashur, i pakujdesshëm, i harruar nga të gjithë, mendoj se kjo është një uri shumë më e madhe, një varfëri shumë më e madhe sesa personi që nuk ka asgjë për të ngrënë”.
“Varfërinë nuk e krijoi Zoti. Jemi ne që e kemi shkaktuar atë, ju dhe unë përmes egoizmit tonë”. / S.M
