Ministri i Brendshëm, Taulant Balla ka reaguar pas kapjes së Klered Bozhanaj, autorit të plagosjes me armë zjarri të policit Edlir Alleshi mbrëmjen e mërkurës në Tiranë.
Përmes një postimi në rrjetet sociale, Balla u shpreh se kush nuk i bindet urdhërit ose thirrjes së ligjshme të policit, ose më rëndë akoma e kundërshton me forcë, duhet ta ketë të qartë që toleranca do të jetë ZERO.
“Përgëzoj Policinë e Shtetit për arrestimin e autorit të plagosjes së efektivit të shqiponjave mbrëmjen e djeshme në Tiranë. Është momenti të kujtoj se kush nuk i bindet urdhërit/thirrjes së ligjshme të policit, ose më rëndë akoma e kundërshton me forcë, guxon ta fyejë, ta agresojë, ta kanosë, ta godasë apo larg qoftë t’i rrezikojë jetën në ushtrim të detyrës apo për shkak të detyrës, duhet ta ketë të qartë që toleranca do të jetë ZERO.
Do bëj gjithçka që një politikë/praktikë e re penale të zërë vend në këtë drejtim, duke kërkuar mbështetjen e sistemit të drejtësisë. Kuadri ligjor është aty në Kodin Penal (me ndryshimet që kam mbështetur vetë në Kuvend në vitin 2019) dhe në ligjin për Policinë Shtetit”, shkruan Balla në Facebook./I.S
