Trajneri i Kukësit Shpëtim Duro është gjobitur nga klubi me heqjen e gjysmës së rrogës.
Shkak për këtë vendim të drejtuesve të klubit verilindor është bërë deklarata e teknikut pas ndeshjes me Skënderbeun.
Në komunikimin me mediet që ka bërë pas mbarimit të ndeshjes, Duro ka lavdëruar mbështetësit e korçarëve dhe në të njëjtën kohë ka kritikuar tifozët e skuadrës që drejton.
“Kampionati ka qenë shumë i ekuilibruar. Këta janë djem heronj sepse të gjithë kanë tifozë ndërsa ne na vijnë 5 tifozë këtu dhe shajnë futbollistët e tyre. Jemi në një ambient shumë të ftohtë ndryshe nga skuadrat e tjera dhe të jesh në vendin e parë është meritë e tyre”.-u shpreh trajneri.
Këto deklarata nuk kanë kaluar pa u vënë re nga drejtuesit e Kukësit, të cilët kanë gjobitur Shpëtim Duron ditën e djeshme. Ky vendim ka ndikuar në atmosferën e klubit, i cili ndodhet në vend të parë të Kategorisë Superiore
Më ironike ka qenë fakti se ditën që trajneri i Kukësit Shpëtim Duro është njohur me vendimin e klubit për këtë gjobë, ka qenë duke festuar 60-vjetorin./Përgatiti: Fjala.al/
