“Kemi nisur përgatitjet edhe për stacionet e plazheve dhe pastrimin e tyre”
Shqipëria po kthehet në destinacion për vizitorët e huaj edhe përgjatë stinës së dimrit, sidomos për turizmin e aventurës nga veriu në jug. Sipas Ministres së Turizmit dhe Mjedisit, Mirela Kumbaro tashmë vendi ynë po futet në hartën e turizmit gjithëvjetor.
“Eshtë shtuar kërkesa për guida edhe gjatë dimrit në shtigje të ndryshme. Gjithashtu është shtuar interesi për rafting nëpër disa nga kanionet dhe lumenjtë e vendit. Tregu i Krishtlindjeve në Sarandë është risi. Boga shumë e preferuar gjatë dimrit.”
Kumbaro shprehet se kanë nisur përgatitjet për stacionet e plazhit dhe pastrimin e tyre. Pas Durrësit, Kavajës, Sarandës dhe Himarës, në 2024 harta e plazheve që do menaxhohen edhe nga Agjencia Kombëtare e Bregdetit do të zgjerohet.
”Në 2023 shtuam Vlorën dhe Rrogozhinën, për shkak se kishin probleme me pastrimin. Në 2024 do të shtojmë edhe plazhet e bashkisë Shkodër dhe bashkisë Lezhë, duke u bërë në total 8 bashki.”
Ministrja e Turizmit dhe Mjedisit Kumbaro nënvizon se risi vitin e ardhshëm do të jenë edhe shtigjet turistike digjitale, duke lehtësuar aksesin e vizitorëve në çdo cep të vendit./O.S
