Ashtu si shumë kompeticione sportive edhe ajo e Wimbledon u anulua për shkak të përhapjes së frikshme të koronavirusit.
Organizuesit e turneut të Wimbledon do të përfitojnë mbi 100 milionë paund nga sigurimet, duke qenë se përfshinë në kontratën e sigurimit dëmet e mundshme nga një virus.
Në vitin 2003, siguracioni për të gjitha Klubet e Tenisit të Hapur dhe Kriketit (AELTC) përfshiu dhe rimbursimin në rast të dëmeve shkaktuar nga një virus.
Për këtë siguracion Wimbledon pagoi 1.5 milionë paund në vit në plot 17 vite dhe në bazë të llogaritjeve totali i pagesave të tyre ka shkuar në 26 milionë paund, por rimbursimi do të bëhet në vlerën mbi 100 milionë.
“Siguracioni do na ndihmojë të mbrojmë bilancin pozitiv deri në një farë mase, ose më saktë në një të madhe. Sigurisht që jemi me fat që e kemi siguracionin dhe sigurisht që na ndihmon, por ai nuk na i zgjidh të gjitha problemet.
Detajet dhe shifrat ndoshta nuk do të merren vesh për muaj të tërë,” -tha kreu i Wimbledonit, Riçard Leuis. Duhet theksuar se anulimi i kampionatit të Wimbledonit ndodhi për herë të parë që nga lufta e dytë botërore, ndërkohë vendimi u mor që turneu të mbahej në vitin 2021./Fjala.al/
