Mënyra e vetme që njerëzit të dalin nga karantina është gjetja e një vaksine ndaj koronavirusit.
Ky është konstatimi që bën kryeministri i Australisë Scott Morrison.
Por pyetja që lind është se po sikur të mos e gjejmë dot një vaksinë ndaj COVID-19 në të ardhmen e afërt, çfarë do të ndodhë?
Këshilltarja e qeverisë për menaxhimin e situatës nga koronavirusi, Jane Halton, pjesë e koalicionit për pandemitë globale, e cila drejtohet nga Bill Gates, shprehet optimiste por edhe realiste sa i përket gjetjes së një vaksine.
Sipas saj, vaksina ndaj koronavirusit mund të gjendet brenda 18 muajve. Por edhe mund të mos gjendet kurrë.
“Vlen të kujtojmë se një nga vaksinat që është prodhuar më shpejt ndonjëherë është vaksina e cila lidhet me fruthin dhe zgjati 10 vjet që kur u identifikua patogjeni e deri kur në të vërtetë ne kishim vaksinën”, u shpreh ajo. Ndërsa shton“se tani po kërkojmë kurën ndaj koronavirusit për një kohë shumë më të shpejtë.”
Po çfarë thotë shkenca?
Jane Halton shpjegon se me gjithë vlerësimet optimiste ekziston mundësia që vaksina ndaj koronavirusit mund të mos gjendet fare.
“Është e vërtetë që jo të gjithë patogjenët që kemi kanë qenë të suksesshëm në zhvillimin e vaksinave” shpjegoi Halton.
Ajo tha se më shumë se optimistë duhet të jemi realistë.
“Tani, unë jam optimiste, më pëlqen të mendoj se shkencëtarët tanë do ta gjejnë vaksinën, por duhet të jemi edhe realistë”, saktësoi Halton.
A ka një plan B nëse nuk gjendet vaksina?
Sipas Halton, pavarësisht se cili do të jetë rezultati, Australia duhet të fillojë përgatitjet për planin B.
“Kam folur pak për atë që quhet ‘plani B’ ndërsa të gjithë presim një vaksinë”, tha ajo.
“Plani B është se do të duhet të mendojmë se si të kufizojmë përhapjen e virusit dhe sëmundjes në komunitetet tona, si të mbrojmë njerëzit, si të mbrojmë të prekurit, të sëmurët, të moshuarit dhe njerëzit, të cilët mund të përkeqësohen nëse preken nga koronavirusi”, theksoi Halton.
Halton tha se përkundër “shenjave pozitive” që shihen deri më tani nuk ka gjasa që sëmundja të eliminohet plotësisht.
“A mendojmë se mund ta eliminojmë? Është një punë heroike që duhet bërë në këtë drejtim, pasi virusi mund të eliminohet diku dhe të shfaqet në një vend tjetër të botës. Ne duhet të mendojmë tani se si do t’i drejtojmë bizneset tona, si do të arsimohemi, si do të qëndrojmë të lidhur me familjen dhe miqtë në një mënyrë që të na bëjë të gjithë të lumtur”, u shpreh Halton./Përshtati nga 7news për Fjala.al, Bardhi Quku/
