Kancelarja gjermane Angela Merkel ka bërë publike planet për të lehtësuar ngadalë kufizimet e vendosura për të parandaluar përhapjen e pandemisë së koronavirusit.
Rregullat e distancës sociale do të qëndrojnë në fuqi të paktën deri në 3 maj, ndërkohë që Merkel rekomandoi fuqimisht që njerëzit të mbajnë maska për fytyrën kur dalin në publik.
Por që nga java e ardhshme dyqanet me një madhësi të caktuar (800 metra) mund të hapnin dyert. Dhe shkollat do të fillojnë të rihapen nga 4 maji, me përparësi për studentët që kanë provime.
Merkel tha që vendi kishte arritur “sukses të brishtë” përmes masave të rrepta kufizuese.
Kancelarja tha se vendi “duhet të përqendrohet dhe të vazhdojë përpara”, duke shtuar se “nuk ka shumë hapësirë për manovrim”.
Tregtarët e makinave, dyqanet e biçikletave dhe dyqanet e librave mund të rihapen të gjithë, pavarësisht nga madhësia e tyre. Parukeritë do të lejohen të hapin dyert e tyre nga 4 maji, me kusht që të respektojnë masat e rrepta të higjenës.
Por heqja totale e masave kufizuese është shumë larg. Kancelarja rekomandoi me forcë që njerëzit të mbajnë maska mbrojtëse për fytyrën gjatë blerjes dhe teksa përdorin transportin publik, duke thënë se kjo “do të ndihmojë në mbrojtjen e njerëzve të tjerë”.
Organizimet e mëdha publike do të qëndrojnë të ndaluara deri më 31 gusht. Baret, kafenetë, restorantet, kinematë dhe vendet e muzikës do të mbeten të mbyllura.
127,584 është numri i personave të infektuar me COVID-19 në Gjermani, ndërsa janë regjistruar 3,254 vdekje.
