Nga Artur Ajazi
Ende një pjesë e politikës shqiptare, mbetet e ndarë në në dy qëndrime, dhe mes shumë pikëpamjeve lidhur me funksionimin e sistemit të drejtësisë së re. Arrestimi i ish-ministrit të Shëndetsisë Ilir Beqja dhe financierit të tij, solli reagime të ndryshme mes politikës.
E ndërsa opozita u “ekzaltua” duke mbushur faqet e portaleve të saj me tituj si “arrestohet ish-ministri nga SPAK, goditje korrupsionit”, madje nuk munguan deklarata edhe nga eksponentë të saj ku “lëvdohej” prokuroria e posaçme, nga ana e pozitës kishte tjetër qëndrim.
Partia Socialiste dhe vetë kryeministrit Edi Rama, e kanë bërë me dije, me kohë, qëndrimin e tyre lidhur me proceset hetimore të SPAK-ut, që kanë në fukus korrupsionin e funksionarëve të lartë. Çdo zyrtar dhe ish-zyrtar i lartë apo i mesëm e qeverisjes, mban përgjegjësi personale për çdo abuzim, shkelje ligjore, apo dhe përvetësim parash publike.
Dhe kjo është logjike duke patur parasysh se, kush gjendet fajtor, kush vjedh paratë e investimeve, paratë e taksapaguesve dhe paratë e BE-së, ka detyrimin të shkojë para drejtësisë pa patur “avokat” mbrojtës as partinë dhe as segmente të politikës. Partia Socialiste, e ka bërë të qartë qysh në fillim se, “çdo ish-ministër, zv.ministër, drejtor drejtorie apo dikush tjetër, që shkel ligjin dhe merret i pandehur, duhet të përballet i vetëm me drejtësinë”.
Kështu ndodh kudo, kështu ndodh edhe tek ne. Por ajo që deri sot po ndodh ndryshe ,(dhe kjo ndoshta jo për fajin e SPAK-ut) mbetet standardi ndryshe me ish-pushtetarët, me ish-zyrtarët që sa kishin pushtetin abuzuan, vodhën, dhe vranë njerëz mes bulevardit. Kjo natyrisht mbetet e papranueshme për këdo që sheh, se si po zhvillohen ngjarjet e mëdha mes politikës dhe organeve të reja të drejtësisë.
Poshtë ballkonit, SPAK-u quhet “grup i strukturuar kriminal, bandë kriminale, vasalë të kryeministrit Rama”, etj..etj.. Kurse kur arrestohet ndonjë ish-ministër i mazhorancës që ka vjedhur në bashkëpunim, SPAK-u “lëvdohet” dhe i thuhet se “po kryen detyrën”.
Atëhere cilën opozitë të besojmë ? Cilën opozitë të quajmë bashkëpunuese në proceset reformuese që nxit SHBA dhe Bashkimi Europian në Shqipëri ? Atë që shan, akuzon, shpif, dhe intimidon SPAK-un, GJKKO-në, apo atë që “fërkon barkun” sa herë ka arrestime nga e majta ? Eshtë qesharake dhe hipokrite qëndrimi dhe pozicionimi i kësaj opozite, në raport me misionin e saj, i cili duhej të ishte mbështetja e strukturave të reja të drejtësisë.
Duke dashur ti përdorë arrestimet apo hetimet e SPAK-ut , si argumente false për kredo politike dhe elektorale, opozita po gabon rëndë. Duke e futur tinëzisht dhe qëllimisht në lojën dhe qëndrimet e saj politike SPAK-un, opozita po shkel hapur kodet dhe parimet legale të veprimtarisë saj politike.
Në Shqipëri, po ndodh ajo që nuk kishte ndodhur kurrë në të shkuarën, kur politika i merrte “nën sqetull” ata që kishin vjedhur, kishin vrarë, dhe kishin grabitur pronat publike, duke abuzuar me mandatin, postin dhe njohjet kryeministrore. Këtu të mos harrojmë 21 Janarin, apo Gërdecin, etj, etj.
Zhveshja nga çdo lloj “avokatie” partiake dhe politike e çdo të korruptuari dhe arrestuari nga SPAK-u, mbetet qëndrimi pa kthim i kryeministrit Rama, duke realizuar kështu premtimin e dhënë, për funksionimin normal dhe pavarësinë e plotë të sistemit të ri të drejtësisë./ S.M
