29 raste me koronavirus u konfirmuan sot në Shqipëri, duke shënuar numrin më të lartë të konfirmuar brenda një dite që prej 4 prillit. 19 ditë më parë kishte po kaq raste të reja, por ajo që vihet re është se rritja duket e qëndrueshme.
Grafiku tregon se që prej 18 prillit, kur u regjistruan vetëm 9 raste të reja, numri është vazhdimisht në rritje. Më 19, 20, 21, 22 dhe 23 prill janë regjistruar 14, 22, 25, 25 dhe 29 raste të reja me COVID-19.
Kjo rritje prej 5 ditësh nuk ishte regjistruar asnjëherë në Shqipëri, që nga data 9 mars, kur u konfirmuan rastet e para.
Janë fasoneritë aty ku po identifikohen kryesisht rastet e reja, pasi gjatë izolimit ishin një prej bizneseve që nuk u mbyllen, por vijuan punën.
Ndryshe nga shumë vende të Evropës dhe botës, ku rastet e reja të infektimit janë në rënie të vazhdueshme, në Shqipëri po ndodh e kundërta.
Shqipëria konsiderohet si një prej shteteve që ka marrë masat më të hershme dhe më të ashpra sa i përket izolimit të qytetarëve dhe gjobave të vendosura. Shqipëria është gjithashtu edhe një prej shteteve që ka realizuar më pak teste në Evropë për COVID-19.
