Drejtoria e Përgjithshme e Doganave së bashku me Dhomën e Tregtisë dhe Industrisë së Tiranës organizuan sot Forumin Dogana – Biznes me fokus lehtësimin e procedurave doganore dhe informatizimin e mëtejshëm të shërbimeve doganore.
Ky forum u vlerësua si një mundësi e mirë për të diskutuar mbi përmirësimin e mëtejshëm të klimës së biznesit dhe raportet me shërbimet doganore.
Drejtori i Përgjithshëm i Doganave, Genti Gazheli, tha se nga 1 janari i vitit të ardhshëm certifikatat e origjinës do të lëshohen në mënyrë elektronike, duke ulur ndjeshëm kohën, por dhe kostot për bizneset.
Ndërsa kryetari i Dhomës së Tregtisë dhe Industrisë Tiranë, Nikolin Jaka, u shpreh se marrëdhëniet e administratës doganore me biznesin aktualisht janë mjaft pozitive.
Nga ana e bizneseve u vlerësua pozitivisht digjitalizimi i mëtejshëm i procedurave doganore dhe lehtësimi i eksportuesve drejt tregjeve rajonale dhe atyre të BE.
Doganat ftuan përsëri bizneset të aplikojnë për statusin e Operatorit Ekonomik të Autorizuar (AEO) dhe Eksportues të Autorizuar për të përfituar nga lehtësitë proceduriale, si dhe nga shumë thjeshtime doganore.
Administrata Doganore ka shtuar së fundmi edhe 4 aplikacione të reja online që biznesi mund t’i aksesojë në kohë reale nëpërmjet E-Albania: statusi i deklarimit të transitit të mallrave, statusi i deklarimit doganor të mallrave, statusi i pagesave në doganë dhe gjendja e llogarisë parapaguese në doganë. S.B
