Një video e gazetarit Blendi Fevziu që tregonte sasinë e nitratit që kishte një pjepër bëri xhiron e rrjeteve sociale në verë dhe shkaktoi shumë reagime për faktin që ne po konsumojmë ushqime plot me kimikate. Ndërkohë sot në emisionin Shqip nga Rudina Xhunga në DritareTV, specialisti i bujqësisë Arben Tufa thotë se këto pajisje nuk duhen përdorur sepse rezultatet që nxjerrin janë të pasakta. Laboratorët e certifikuar janë të vetmit që japin një përgjigje të saktë për sasinë e kimikateve që ka një frut apo perime.
“Sot njerëzit në Evropë duan të dinë çfarë fruta, perime, zarzavate po hanë. Kush mund ta bëjë këtë? Specialistët e bujqësisë i japin garanci konsumatorëve që ky ushqim është i mirë. Në çastin që ka një problem ushqimi që konsumatori blen, ai kthehet mbrapsht për kontroll qeveritar dhe ne shkojmë jo vetëm te bima kur është vjelë, por te gjithë rreshti. Pra është problemi si e gjurmon nga vjelja deri te konsumatori. Kjo kërkon një dokumentacion. Bujku sot duhet të ulet të bëjë një analizë të parametrave që ka toka për të mbjellë një furt, perim apo zarzavat. Një bimë kërkon azot, fosfor, kalium, etj. Ai bën llogaritë sa ka toka dhe sa do i hedhin ata. Në çastin që i hedh, pasi mbin bima, i merr disa gjethe edhe i çon për analiza për të treguar që bima është e saktë. Edhe kur produkti piqet i bën analizë për të parë sasinë e nitrateve. Domethënë unë e shes me garanci. Blerësi ka të drejtë ta marrë produktin, ta çojë për analiza në laboratorët e tij edhe kështu vërteton edhe një herë që është i saktë.
Kriteret për të dalluar nëse një produkt është i saktë, shihen kur bëhen analiza organoleptike, pra pamja, shija, era, forma, madhësia. Ndërkohë nga ana kimike, problematike janë nitratet, sa përqindje ka. Një përgjigje reale merret nga laboratorë të certifikuar, jo nga këto pajisje që shohim kudo. Nuk mund ta bëjë çdokush këtë analizë. Unë nuk i besoj pajisjeve të tilla, nuk i përdor. Ligjërisht jam i detyruar që çdo tre muaj të çoj në laborator të gjitha elementet e rritjes së bimëve, pa përjashtim.”, thotë specialisti i bujqësisë në DritareTV. S.B