Shpërthimi i fruthit, sëmundjes më ngjitëse në botë që filloi në perëndim të Teksasit, është përhapur zyrtarisht në një nga qytetet më të mëdha të SHBA-ve.
Zyrtarët shëndetësorë konfirmuan dje dy raste të fruthit në zonën metropolitane Dallas-Fort Worth, e cila ka rreth 8 milionë banorë. Të dy rastet janë lidhur me shpërthimin që ka infektuar qindra persona dhe ka shkaktuar vdekjen e dy fëmijëve.
Një rast u raportua në qarkun Collin, që përfshin periferi si Plano dhe Frisco, ndërsa rasti tjetër në qarkun Rockwall, në skaj të metropolit.
Nuk janë dhënë detaje të mëtejshme për pacientët, përfshirë moshën, statusin e vaksinimit, mënyrën e infektimit apo nëse e kanë transmetuar virusin te të tjerët.
Megjithatë, rastet kanë shkaktuar alarm, sidomos për shkak të lidhjeve të përditshme ajrore të qytetit me metropole të tjera si Los Angeles, New York, Houston dhe Chicago.
Ky raport vjen vetëm një javë pasi SHBA raportoi zyrtarisht 1,000 raste me fruth këtë vithera e dytë që numri kalon këtë prag që nga viti 2000, kur sëmundja u shpall e zhdukur në vend.
Departamenti i Shëndetësisë i Teksasit njoftoi për dy rastet e reja në një përditësim të publikuar të martën në panelin e tij zyrtar.
Shtatë raste fruthi janë raportuar në zonën Dallas-Fort Worth që nga janari – pesë prej tyre nuk janë lidhur me shpërthimin kryesor dhe mendohet të jenë raste të izoluara të importuara nga burime të tjera.
Zyrtarët e qarkut Collin paralajmëruan më 10 dhe 11 prill për një ekspozim të mundshëm ndaj fruthit, pasi një pacient vizitoi disa vende publike në Plano ndërsa ishte ngjitës, përfshirë një Walmart, Ross Dress for Less dhe një Dollar Tree.
Ndërsa më 16 prill, autoritetet e Rockwall raportuan një individ që kishte rezultuar pozitiv me fruth pasi ishte kthyer nga një udhëtim në Perëndim të Teksasit.
Në qarkun Collin, vetëm 93.3 për qind e fëmijëve të kopshtit ishin të vaksinuar në vitet 2023 dhe 2024, ndërsa në Rockwall kjo normë ishte më pak se 92 për qind.
Që nga janari, gjithsej 717 raste me fruth janë raportuar në shpërthimin e Teksasit, duke e bërë këtë shpërthimin më të madh në SHBA që nga shpallja e zhdukjes së sëmundjes./e.s
