Partia Socialiste i është përgjigjur shkurtimisht letrës së mbërritur nga opozita jashtëparlamentare, e cila kërkonte për të hënën e 25 majit, mbledhjen e Këshillit Politik për reformën zgjedhore. PS sqaron PD dhe LSI se mbledhja nuk mund të zhvillohet të hënën, pasi është festa e Bajramit, por është shtyrë për të martën.
“Të hënën është Bajram e për rrjedhojë është ditë pushimi. Mbledhja do të zhvillohet më 26 maj, ora 11:00 te Pallati i Kongreseve”, thuhet në reagimin e PS.
As 1 javë nuk zgjati pezullimi i pjesëmarrjes së opozitës jashtëparlamentare në tryezën e Këshillit Politik. Kryeopozitari Lulzim Basha vendosi për pezullimin të dielën e kaluar, kur bashkia e Tiranës shembi godinën e Teatrit Kombëtar, por pas negociimit të ambasadorëve, PD dhe LSI do rikthehen sërish në tryezë.
