OSBE ka reaguar në lidhje me projekt-ligjin antishpifje, i cili po dërgohet në parlament për miratim.
Në reagimin e saj, OSBE shprehet se për këtë projekt-ligj është punuar me Edi Ramën dhe me qeverinë. Po ashtu, OSBE vë në dukje se është punuar për të përmirësuar projekt-ligjin mbi median.
“Kemi punuar me Edi Ramën dhe qeverinë për këtë projekt-ligj. Kemi punuar për të përmirësuar projekt-ligjin mbi median. Duam të miratojmë një ligj, i cili ështe brenda standardeve demokratike ndërkombëtare”, thuhet në njoftimin e OSBE.
Për më tej OSBE bën të ditur: “Shumë përmirësime në versionin e fundit të botuar sot në krahasim me projektligjet e mëparshme: detyrimet e regjistrimit janë eliminuar; masa mbrojtëse të përgjithshme lidhur me standardet ndërkombëtare të prezantuara (neni 4); janë futur kufij të rreptë për marrjen e përmbajtjes (neni 132); rregullimi i së drejtës së përgjigjes është përshtatur me nevojat e botimeve elektronike dhe është kufizuar për të shmangur keqpërdorimet (neni 53/1); atribuimi i ri i AKEP është eliminuar”.
Ndërkohë, në reagimin e OSBE thuhet: “Zyra do të monitorojë nga afër zbatimin e ligjit i cili, në asnjë mënyrë, nuk duhet të pengojë lirinë e shprehjes dhe lirinë e mediave. AMA duhet të zbatojë ligjin në një mënyrë vërtet të pavarur”.
OSBE thotë se puna do të vazhdojë për të ulur nivelin e gjobave, dhe për miratimin e një instrumenti nënligjor të ardhshëm, në mënyrë që të garantohet se nuk mund të vendosen gjobitje jo proporcionale për ofruesit e shërbimeve elektronike të publikimit.
Ndërkohë Kryeministri Rama vazhdon të jetë këmbëngulës se paketa antishpifje nesër do të shkojë për miratim në seancën plenare të Kuvendit. Rama shkruan se është i keqardhur për ata që mendojnë se po cenohet liria e shprehjes pasi nuk e kanë lexuar ligjin e ri. Sipas tij ky ligj është konsultuar me OSBE dhe është dakordësuar dhe me ekspertët e Vjenës.
“Keqardhje për ata që lirinë e shprehjes e përdorin për t’u ankuar për mungesën e lirisë;për ata që nxjerrin deklarata pa lidhje fare me ligjin e ri; për ata që çirren për diktat imagjinar mbi mediat dhe për të gjithë bashkë që as nuk e kanë lexuar tekstin. Projekti do të hyjë nesër për miratim në seancë pas një pune të përbashkët thuajse njëvjeçare me OSBE e i dakordësuar 100% me ekspertët e zyrës së Vienës nën drejtimin e Harlem Desir. I falenderoj për kontributin e çmuar dhe angazhimin në vazhdim për aktet nënligjore”, shkruan Kryeministri.
